Musika, tresna terapeutiko bat da eta pertsonen osasun fisikoa, psikikoa, emozionala, soziala eta/edo espirituala suspertzen, mantentzen eta hobetzen laguntzen du, komunikazioa ahalbidetuz, sormena piztuz, adierazpena erraztuz eta hemen eta orainarekin lotuz. Tailer hau talde prozesu bat da, indarkeria egoerak pairatzen ari diren edota bizi izan dituzten emakumeei indarkeriak eragindako ondorioetatik berreskuratzen, berrezartzen edota berrasmatzen laguntzeko. Taldean burutzeko proposamena da, gainontzekoen esperientziekin norberarena aberastea ahalbidetzen duelako, aferak elkarbanatu eta ulertzeko elkargune zein laguntza sare berriak sortuz. Horretarako musikoterapia teknika desberdinak (soinu geruzak, inprobisazio klinikoa, musika eta mugimendua, kantuen sorkuntza, GIM, musika eta irudiak, KMR metodoa, musikarekin irudikatze sortzaileak…) mandalekin konbinatzen dira.

• Tailerraren iraupena: 10 edo 12 saio
• Maiztasuna: Astero
• Saio bakoitzaren iraupena: 2 ordu

Musikoterapia bitarteko sortzaile bat da eta aukera ematen du adierazpena eta prozesu emozionala lantzeko, identitatea garatzeko eta gaitasunak, trebetasunak eta autoestimua indartzeko. Ziurtasuna eta autokonfidantza elikatzen dituen espazio babestua da eta ahalduntzerako aukera aparta ematen du. Tailer hau taldean burutzeko proposamena da, gainontzekoen esperientziekin norberarena aberastea ahalbidetzen duelako, aferak elkarbanatu eta ulertzeko elkargune zein laguntza sare bat sortuz. Honako hauen bidez lan egiten da: perkusio zirkuluak, musikak gidaturiko iruditeria (GIM), inprobisazio musikala, musika eta mugimendua, musika eta irudiak, abestien sorkuntza, soinu geruzak, musikarekin irudikatze sortzaileak eta mandalak.

• Tailerraren iraupena: 10 saio
• Maiztasuna: Astero
• Saio bakoitzaren iraupena: 2 ordu

Bidaia bat irudimenean zehar, konpainian, musika gidari dela eta bizipenak maletan hartuta. Etapaka antolaturiko bidaia ekialderantz, hegoalderantz, mendebalderantz eta iparralderantz, norberaz jabetuz kontzientzia indibiduala eraldatzen eta bideak, jakintzak eta esperientziak partekatuz kontzientzia kolektiboa transformatzen. Azken geldialdia, bizi naizen tokirako eta parte naizen sarerako ekartzen dudanarekin etxera buelta.

• Tailerraren iraupena: 5 saio
• Maiztasuna: Astero
• Saio bakoitzaren iraupena: 90 minutu

Gorputzaren erlaxazioak, musikaren entzuketa aktiboak eta irudimenaren kontenplazioak bat egiten duten autozaintzarako eta elkar zaintzarako espazioa da. Musika, iruditeria eta mandalak dira, dugun potentziala, boterea eta gaitasunaz jabetzeko erabiltzen diren tresnak. Norberaren baitara bidaia bat da, autoezagutzatik kontzientzia eraldatuz. Emozio, pentsamendu eta kezka desberdinen miaketa eta adieraztea eragingo duen eremu bat eskainiko da, hauekiko eskura dauden aukerak zabaldu asmoz. Talde esperientzia bat da, psikoterapiarako kontraindikaziorik ez duten pertsonekin, laguntza, elkargune eta elkar ulertze sareak elikatuz.

• Tailerraren iraupena: 8 edo 10 saio
• Maiztasuna: Astero
• Saio bakoitzaren iraupena: 90  minutu

Genero berdintasunaz ✹ parekidetasunaz norberaren irizpidea haurtzarotik eraikitzen hasten da, hausnarketa bizitzako edozein arotan bidelagun aberasgarria delarik. Gaiaren inguruan hausnartzeko artea helduleku interesgarria da, eskaintzen duen dimentsio sortzaileak egiteko abagunea ere eskaintzen duelako. Tailer honetan hausnarketa sustatzen da genero berdintasuna ✹ parekidetasuna gaitzat duen ipuin baten bidez. Horrez gain, parte hartzen dutenen gogoetak elkarri lotuz abesti bat sortu eta grabatzen da. Honela, adierazpena ere sustatzen da.

• Tailerraren iraupena: 90 minutu
• Adina: 7-12 urte

Balioetan oinarritutako hezkuntza haurtzarotik garatzen da,  hausnarketa bizitzako edozein arotan bidelagun aberasgarria delarik. Gaiaren inguruan hausnartzeko artea helduleku interesgarria da, eskaintzen duen dimentsio sortzaileak egiteko abagunea ere eskaintzen duelako. Tailer honetan hausnarketa sustatzen da bullyinga gaitzat duen ipuin baten bidez. Horrez gain, parte hartzen dutenen gogoetak elkarri lotuz abesti bat sortzen eta grabatzen da. Honela, adierazpena ere sustatzen da.

• Tailerraren iraupena: 90 minutu.
• Adina: 7-12 urte.

Nerabezaroa aldaketa fisiko, mental eta emozionalen garaia da, zalantzarik gabe aukerez jositako aroa da. Adin horretan genero ikuspegia txertatzeak gizarte justuago bat izatea ekar dezake. Taldeko jarduerak elkarreraginerako abagune dira, kide izatearen eta bereizketaren sentimenduak jokoan jartzeko bide ematen dute. Taldeko esperientzia positiboek garapen osasuntsua bultzatzen dute eta musikoterapiak adierazpena sustatzen du, nortasuna eraikitzea ahalbidetuz. Tailer honetan genero ikuspegiaren gaia lantzeko, berau ardatz duten bideoak ikuskatu, euren abesti gustukoenen letrak aztertu eta hauen bidez hausnarketa sustatzen da, eta beraien ideia eta pentsamenduen adierazpena bultzatzeko trap edo rap kantuak sortu eta grabatzen dira.

• Tailerraren iraupena: 5 saio
• Maiztasuna: Astero
• Saio bakoitzaren iraupena: Ordubete / ikastordu 1
• Adina: 13-16 urte

Tailer honen xedea adineko pertsonen zahartze aktiboan mesedegarri izatea da, euren ongizate fisikoa, psikologikoa, emozionala, soziala eta espirituala esperientzia musikalen bidez sustatuz. Independentzia handiagoarekin bizitzeko aukerari garrantzia emateko gunea da eta funtzionamendu motrizean, kognitiboan eta afektiboan hobekuntza eragiten du. Taldean burutzeko proposamen honen bitartez, gainontzekoen esperientziekin norberarena aberastea ahalbidetzen da, elkar ulertzeko zein laguntzeko sare bateko partaide izanez. Abesti esanguratsuak kantatzen dira, musikaz lagundutako erlaxazio eta irudikatzeak lantzen dira, musika tresnak jo, kantuak sortu, musika inprobisatzen da eta musika eta mugimenduzko jardueren bidez ere lan egiten da. Burutuko diren musika esperientziak parte hartzaileen ezaugarrien eta beharren arabera proposatuko dira, beti ere musika oinarrizko tresna izanik eta esku hartzea taldearen prozesuari egokituz.

• Tailerraren iraupena: 10 saio
• Maiztasuna: Astero
• Saio bakoitzaren iraupena: Ordubete

Jolasa haurraren garapenerako erabilgarria eta beharrezkoa da, inguruarekin erlazionatzeko duen berezko era. Jolasak hazkuntza fisikoa, emozionala, kognitiboa, afektiboa eta soziala ahalbidetzen dizkio haurrari eta bere bidez, balioak ikasten ditu, trebetasunak barneratu eta jarrerak garatzeko aukerak bizi ditzake.  Jolasaren bidez haurrak gorputza, zentzumenak, pentsamendu gaitasuna eta sormena garatzen ditu eta ezinbesteko tresna da komunikatzeko, sozializatzeko, emozioak kudeatu eta adierazteko, garapen moralerako, kultura jasotzeko eta nortasuna eraikitzeko. Proposamen honetan jolasaren aukerak musikaren aukerekin bateratuko dira, elkarrekin ahozko dimentsioari, dimentsio ez-berbalari, dimentsio dramatikoari, dimentsio musikal-eraikitzaileari, eta dimentsio figuratiboari leku egiteko.

• Tailerraren iraupena: 2 saio
• Maiztasuna: Astero
• Saio bakoitzaren iraupena: Ordubete
• Adina: 3-6 urte

Jolasak dibertsioaren bidez hazteko eta harremanak izateko aukera ematen du. Haurrak esperientzia hori bere maiteekin eta gainontzeko familiekin partekatzean, familia-loturak sendotu eta aberasten dira. Haur kantutegiko abestiak kantatzen dira, ipuinei soinua eta doinua jarri, dantzatu, soinuak esploratu, musika inprobisatu eta adierazi, bibrazioa gorputzean sentitu eta gorputzarekin musika egiten da.

• Tailerraren iraupena: Ordubete
• Hartzaileak: 9-17 hilabete edo 18-36 hilabete bitarteko haurrak dituzten familiak

Zaintza musikalak soinu geruzen bidez soinuak partekatuz, eta emakume*en arteko sarean bibratuz. Zaintzaren hartu-emanerako bizipen espazio batean, soinua jasoz eta emanez. Parte-hartzaileek soinuak eskaini eta jasoko dituzte, kontsigna bakarra soinua jasotzen ari dena zaintzea eta soinua jasotzean zaintzen uztea izanik; bide batez bizipen musikalak ideia eta hausnarketei egin diezaieken ekarpenaz baliatuz. Ez da beharrezkoa musika jakitea.

• Tailerraren iraupena: 2 ordu